Girta hai… samhalta hai…
Kaheen dakhiyanoosi hai…
To kaheen badalta hai India….
Fir bhi chalta hai India…
Red light pe kabhi kabhi rukta bhi hai…
Bhikhari ko dekhke dil dukhta bhi hai..
Horn bajaake… side se bachtey bachaatey…
aagey nikalta hai India…
Fir bhi chalta hai India…
Doston pe jee jaan lutaata hai…
Khushiyaan ho ya gum,
Rishtedaaron ko jaroor bulaata hai…
Baat baat pe biwi se rooth jata hai…
Aur fir manane ke liye khana pakaata hai,
Shaant hai kabhi samandar sa,
To kabhi nadjiyon sa machalta hai India..
Fir bhi chalta hai India…
Kabhi ghotaalon pe baatein karta hai…
Kabhi aasmaan chhone ki to kabhi
Aagey badhne ki baatein karta hai…
Fir practical ho jata hai aur
Ghar chalaane ki baatein karta hai…
Bheed me bojh bankar..
Kaandhey pe dalta hai India…
Fir bhi chalta hai India…
Wo kanchey, wo gilli dandey ke khel,
Chuk chuk karti hui bachchon ki rail….
To kaheen chai ki dukaan par..
Ek pappu zindagi me ho jata hai fail…
Har gaanv.. har gali.. har mohalley me…
Bachpan banker tehelta hai India…
Fir bhi chalta hai India
Barfeeli chotiyon pe haddiyaan galaata hai…
Poorey desh ko khud me kuch is tarah samaata hai…
Ladaayi na to fitrat hai na kamjori hai humari…
Ye dushmano ko har baar yaad dialata hai..
Seena taaney, mun me thaaney, jeet jaane ke liye…
Baat maaney, saans thaame, vijay geet gaane ke liye…
Har baar pushp se lohey me dhalta hai India,,,
Fir bhi chalta hai India…
Hindu nhi.. muslim nahi.. koi sikh isaayi nahi…
Insaaniyat se badhke koi jahaan me khudayi nahi…
Kabhi hindu ke naam pe…
Kabhi muslim ke naam pe…
Sikh to kabhi isaayi ke naam pe…
Pal-Pal jalta hai India…
Fir bhi chalta hai India…
Malls aur hotels ki OOnchi imaarton ke beech…
Kabhi mangal bazaar ki cheekh chillahaton ke beech…
Kabhi local ke dhakko to kabhi
sadkon ke gaddhon ke beech…
roz palta hai India…
fir bhi chalta hai India…
No comments:
Post a Comment